الـ«رَتش» زبالة المقاولين.. أسفلت زمان
«الرتش» كلمة ممكن تكون غريبة، بس الكلمة دي يعرفها الناس بتوع زمان في الأرياف والصعيد وكمان اللي شغالين في المقاولات.. أنا هقولك يعني ايه «رَتش».
الرتش ببساطة هو كل البواقي اللي بتطلع من مواقع البناء زي الأسمنت والرمل وكسر السيراميك وبواقي الجبس.. والرتش بالنسبة للمواقع دي زبالة عاوزة تتخلص منها بأي طريقة.
ثروة للي يعرف قيمتها
زي ما مواقع البناء عاوزة تتخلص منه بأي طريقة إلا إن في ناس كل شغلنتها إنها تاخد الرتش ده من المواقع دي بعربيات نقل وتفرز كل حاجة لوحدها الطوب مع بعضه وتبيعه وكسر السيراميك وهكذا.. وده بيتباع هو كمان والرمل والاسمنت حتى التراب بيتباع ومفيش حاجة ملهاش تمن بس اللي يعرف قيمة الثروة دي.
الرتش أسفلت الغلابة
الطرق في الأرياف والصعيد زمان كانت معظمها مش مرصوفة فكانت الأهالي بتجيب الرتش وتحطه في الطرق عشان الناس تعرف تمشي في المطره ومتتبهدلش في الطين.
