«القصعة».. الصحة مبقتش تستحملها

القصعة، كلمة مش غريبة على أي حد اشتغل في المعمار، والقصعة دي كانت ملاذ وشغل لناس كتير، وصناعة من الصناعات المرتبطة بمواد البنا.. أنا هقولك يعني إيه قصعة.. القصعة ببساطة بتكون على شكل طبق كبير من الصاج وله جوانب، ودي بيتشال فيها المونة اللي هي الأسمنت يعني.. وبيكون في شخص شغلته يشيل المونة في القصعة ويوديها للبنا أو مبيض المحارة، وده بيسموه الصبي.
القصعة مبتقولش لأ.. دا مثل معروف في كار المعمار.. يعني الناس زمان كانت لما مبتلاقيش شغل كانت بتروح مع أي مقاول وتشيل القصعة وبكدا القصعة مزعلتش حد ورحبت بأي واحد عاوز يشتغل، والرمل والأسمنت، بس الفرق كبير بين زمان ودلوقت، عشان كانت صحة الناس زمان حديد، وتتحمل تشيل الزلط، لكن دلوقت الصحة مبقتش تستحمل.
القصعة بدأت تختفي بعد ما ظهرت أدوات كتير قدرت تأدي نفس الدور اللي كانت بتقوم بيه.. زي الونش اللي بيطلع الطوب، والمونة، والرمل، والزلط، بس القصعة لما بدأت تختفي أخدت معاها فرص شغل كتير كانت بتتوفر في المعمار.